I demeùrun la canpagne coume ine fouite, in acotall, coume ine librtai, coume in raeve de jhitràe lés granjhes pi z-ou tornàe a boetes néres, coume ine chance, coume ine safe place, coume in marea que noutre loquence a de besén, noutre loquence que trtous·tes avant de besén itou, pr avoer ghére pu pour aus in·es pi aus àutres. I fouijhun coume la perspective d’in poussiblle, voure que tot pet étre dit, pi voure que tot pet existi devore le réàu.

I défendun la faete coume ine aque dau criaciun, autant que dau regricerie. Bardai·e·s de retrovalles pi de boutifalle entour daus grandes tabllàies, i oçhupun le marea pr la benaiserie. I savun la chaumance dau s’agrouàe, é i araeterun pa tant que noutre librtai dau dançàe, dau brulàe pi dau s’aemàe serant pa abriaies atou.

I voulun adrigallàe daus grouàies, adrojhàe le munde pr causàe daus rencuntres, métre en commun daus émajhinaeres é daus éstétiques. I créyun en noutre force pr unesir, rapilotàe é partajhàe. I pensun que cha prsoune a sa renjhe, sa pllace, artiste bédun pa, a cause qu’i sun prsuadàie que l’argardure acti, ol ét maeme ine aque créative. Ol ét pa çhés é çhéles çhi sant argardais, pi çhés é çhéles çhi lés argardant. Rén que daus parçounàes acti·ve·s, bruant·e·s, échalupai·es, éngajhai·e·s pi sensiblles.

I prtendun pa tot saver, étre trjhou drét·e, ou nous tenant ac nos discourences. I prtendun pa étre choenes en çhau qu’i fesun - i finirun jhamae d’aprendre. I prtendun rén qu’ol ét içhi, quauque chouse qu’o faut sauvàe, afiàe é abriàe. I sun au sérvice dau danjhàe é daus ranches, daus asseyes pi daus bourdajhes, daus abenances é daus évolajhes, au sérvice dau doutance pi dau cas coumun.

I açheùllerun lés pu grand·e·s coume lés pu petit·e·s, du moument que le jhésce ét révoluciounaere, jha ghére a l’échale dau munde, mé a l’échale de sàe – en nous miremundant dés échales dau chaquin·e.

I refusun de maeme de crére qu’ol ét in gradement entr lés éstétics pi les cunplliments. I promulgun lés paroles neùes. Nun pa qu’alles avant jhamae été dites, mé qu’alles méritant d’étre trtoutes repétaies, atrencaies, huchaies pu fort, dançaies, chantaies é prchantaies. I refusun é cundanun tots les paroles pi les aques de haene é de disténgaciun çhi neùrait a queùquin·e.

I sun prsuadai·e·s que l’oumén, le çheùr, le sensiblle, l’art, et totes lés émociuns qu’i travrsun en tant que prsoune, jhénéraciun, minouretais, devant étre le mitan pi le préncipe maeme de s’agrouàe, en-delae du souçea é de la rentabilitae. I proumétun d’étre au sérvice de la débrolle. I refusun lés soluciun tot fasues çhi aburant nos émajhinaeres.

I pensun que l’art, o ne pét chaulér sa formance, sa pllastic, sun saboui é sun anunce, ol ét in accélérour dau sensiblletai, d’aemour, de jhàie pi de faete. L’aque criati, ol ét pas pr entrnous ine définiciun, mé in préncipe trjhou émouvai, au mitan de nos cunsidérances, dessu pi en-lae les pllanches é la lumére, pr se désabrjhàe bérède présent, en éyant étai bérède allours. I refusun de nous çhitàe enmenàe pr la représentaciun, la prformativité, pi tot çheu çhi touche aux barères mausénes de noutre argardure dessu le munde é les àutres.

I prchantun nos témougnajhes é nos archives, prsounaues é colétives, quéme in parlanjhe coumùn. I muntun noutre loquence pr qu’al existisse, pisqu’i pensun qu’o fàut qu’al rechte pi chés racuntaciun itou – en un grand fuchtin d’émajhes, de suns, de vidéos, de coulours, de témougnajhes vivants, pr un érajhe colécti.

I ousun dire qu’i avun été bllaessai·es, cheùgnai·es, prsounaùment é colétivement, pi refusun aneùt de cuntinuàe chés vioulences, sen lés noumàe ni lés batallàe. I avun pu pour d’acadrouàe, de pa pllére, d’étre mal aemai·es. I avun cunprenghu noutre force : noutre bénvelence pi noutre résilience. Çhés çhi veudrae leù neùre, i avun pu lési d’assayàe a lés défendre ni a lés assegràe.

I nous tenun pràet·es a partajher nos éspériences é noutre facun de faere colécti, d’aprendre a acotàe aus viméres, de trjhou étre ensemblle, de trjhou se renvenciounàe, de se quésciounàe.