*FUCHTIN ARTISTIQUE
DAU DÉBROLLES & D'ARCHIVES

Le FADA, ol ét ine assenbllàie çhi se tént pendant troes jhours, pr rapilotàe daus jhénes artisces amatour·ouse·s et demi-pro den de spectaclle vivant é les muntreries.

Fada (num male) : mout prouvençàu pr dire « grand fou, in petit carvirai ». Lés fadas prouvençàus sant itou daus petites criatures, amics daus fàies, cousins daus saprais « fadéts » dau Poetou.
D'apràe le Dicciounaere pouétique émajhinaere

Pendant chéle assembllàie, i acotun les atornements artistiques en criaciun et chaus é chéles-la çhi lés émajhinant.

Le FADA veùt étre in marea d'asseye, abrijhai entr le boucajhe é la pllane dau Poetou, su la coumune de Luchae-Touarsai. Ine vélle férme ét praetaie a la parçounerie, çhi la chanjhe pr le moument : la granjhe devént ine séne de spectaclle, la remorque in marea de lirie, les chanps, in poussiblle a la criaciun.

I velun égourmi totes les façuns artistiques, sultout chéles çhi rebunbant ac noutre mimoere coléctive, nous tradiciuns, et noutre érajhe pr lés émouvàe a noutre façun, é trovàe ine manére neùe de faere ensemblle.

Apràe ine apelance a entrzuns, lés artisces sant cunviai·e·s a muntràe lou trcherie é lou criaciun dau moument den in mitan bévelant é amitous.

Pendant troes jhours, lés jhornàies sant cadençàe pr daus chantiés, tablle rundes é daus marea de libre éspréssiun, pi daus criaciun de tiatre é de dance grlaies. Daus éstand d'art pllastiques é de criaciun de féti sant apuntais. Pi apràe la menjherie colétive, i nous rapilotun pr lés cuncerts, lés spectaclles et les muntreries. Lés cunvives rechtant su tote la duràie de l'assembllàie et sunt énvitàies a étre trjhou çhérieùs·e·s é bounasses ac lés muntreries.