*GROUÀIE ARTISTIQUE
DAU DÉBROLLES & D'ARCHIVES

Apràe cénc annàies d'éspérimentaciuns pendant sés fuchtins artistiques dau débrolles é d'archives, le colécti avét core la fréngale.

Ine fréngale de chaus mouments de beatai d'épave, chaus frojhes daus rencuntrances pa prévéyues é daus émajhinaciuns foucardes, çhi sant la carmine dau FADA.

Mé çhi avant trjhou çhaus mouvaes saboui de trop poe. De trop court.

Alore, dame, le colécti s'at mouvai.

De çhau saboui at naeçhu l'idàie de cunviàe ine grouàie de munde a véndre jhitràe le marea pendant pu lungtenp, pr arolàe la demeùre, y faere grouàie.

La TADA, ol ét ine éspéce de éstajhe, de retirance. O rapilote ine çhénzaene de cunvives, tiatrous·e·s, téchnicien·ne·s, sénografes, musicour·ouse·s, couturàe·ére·s, pénturour·ouse·s, pi patin pi coufin.

En pu de chéle jholie grouàie de munde, la TADA ouvre lés portes de Fourchevière é de sés mareas de criaciun, pr pevàe su ine semaene, prpousàe in ragaciun pr les àutres cunvives dau FADA.

Fantoumes, folklore pi vela.

Pr sa prmiére foes, la grouàie artistique de débrolle é d'archives rapiloterat sés 13 agrouai·e·s pr grafougnàe, lire, jhouàe, musicàe, muntàe su le marea, sés anciéns, sés rituàus é sés fadéts.

Arolàe le marea, se riortàe aus abres, aus dérnàes riàus, aus invesiblles é aus istoeres ; pi coumençàe le bal ac in ragaciun, ine souvenence, in cunte au cogn dau feù.

Ac lés reliques dau vivanjhe daus pésans d'àutrefoes a Fourchevière, trovaies den lés gllénes daus annàies 1970, é en se sarvant de tésces de tiatre de yér é d'aneùt, la TADA ençhéterat su sés fantoumes pu ou moén noveas, su lés remenbrances de sa granjhe, sa souvenence daus féns é daus pouvres.

⠀⠀⠀⠀⠀⢀⣴⣿⣿⣿⣦⠀
⠀⠀⠀⠀⣰⣿⡟⢻⣿⡟⢻⣧
⠀⠀⠀⣰⣿⣿⣇⣸⣿⣇⣸⣿
⠀⠀⣴⣿⣿⣿⣿⠟⢻⣿⣿⣿
⣠⣾⣿⣿⣿⣿⣿⣤⣼⣿⣿⠇
⢿⡿⢿⣿⣿⣿⣿⣿⣿⣿⡿⠀
⠀⠀⠈⠿⠿⠋⠙⢿⣿⡿⠁⠀